عەبدوڵا یڵماز تەمەن ٦٢ ساڵ کە دمای ٣٠ ساڵا و یەرې مانگا جە زیڼانو بوجا کرکلاری شارو بوجاو ئیزمیرینە ئازاڎ کریا، ئەرەیاۋناش؛ پەشتیوانی جە بانگەوازەکەو ڕابەر ئاپۆی مکەرۊ.
عەبدوڵا یڵماز جە ۋەربەرەو زیڼانەکەینە جە لایەنو بنەیانەکەیش و ڕاوەبەراو جەمەو هامکاری چنی بنەیانەو زینانیا و حوکمدریایا-ئیجە (توهای-دەر ئیجە) بە جۆشۊ پێشوازیش ۋنە کریا. یڵماز چاگە قسېش کەرڎې و ئەرەیاۋناش کە هەڤاڵەکېش جە زیڼانەنە داراو ڕۊحیەتێوە بەرزېنێ و بە وردی شۊنیرەلوای پەی پرۆسەو ئاشتی مکەرا.
دماتەریچ یڵماز بە بەربڕیەی متمانەی تەمامیش بە ڕابەر ئاپۆی و پەشتیوانی پەی بانگەوازو ئاشتی و گلێرگەی دیموکراتیکی کە ٢٧و شووباتی دەسش پنە کەردەن، هۊنیێوە کوردیەش وەناوە و دماتەریچ کاوەترێوە چەرمېش پېسە هێماو ئاشتی ئازاڎە کەرڎە.
عەبدوڵا یڵماز ساڵۊو ١٩٩٥ی جە شارو سێرتی باڵبەس کریۊ، دماتەریچ جە لایەنو دادگاو ئاسایشو ئێلحیۊ سزاو زینانی هەتاهەتاییش سەرەرە سەپیۊ. بە درێژایی ئا ساڵا جە زینانەکاو ئێلح، سێرت، شاکران ئیزمیر، سێڤەرەک و ڕحاینە مەنۊوە. هەرپاسە چی ماوەنە تووشو کێشەی تەندروسی قورسی بییەن.
ئەرەیاۋییا کە یڵماز جە چن ڕۊی ئایندەنە گێڵۊوە پەی شارو ئێلحی، ماواو وېش.
