کۆمیسیۆنو سیاسەتەکا پەروەردەو دەم پارتی ئەرەیاۋنېوەش وەڵا کەردۆ و واتش: "جە سەراسەرو جەهانینە مامۆسې پېسە نوێنەرې زانستی، ڕەنجی و ڕۆشنگەری پێشوازیشا ۋنە مکریۊ؛ بەڵام جە وڵاتو ئێمەنە ئینې چېرو فشاری ڕامېیاری، هەژاری و نائەمنی ئایندەینە."

کۆمیسیۆنەکە ئەرەیاۋناش، مووچەو مامۆسایا ئینا چېرو هێڵەو هەژارینە و ناڕەزایەتی وېش بەربڕی ۋەرا ۋەر پانەیە کە ئایندەو مامۆسای، خۊنکارا و گلێرگەی دەسش سەرەرە گېریۊ.

کۆمیسیۆنەکە واتش: "سیستەمو پەروەردەی ماۋێوە فرەن ئینا چېرو فشارو سیاسەتو یەکپەرەسی و پاوانوازانەینە" و ئاماژەش پانەیچە دا جیای پەروەردێوە دیموکراتیک و زانستی، شەپۆلۊو ئیسلامی ڕامېیاری، نەژاڎپەرەسی و تاونایۊ مسەپیۊ.

جە ئەرەیاۋناکەنە ئامان: "بە گرنگش موینمێ سەرو بنەماو هاموڵاتیبییەی یەکسانی ژیۋایێوە کۊمەڵایەتی عەلمانی بنیاڎ بنریۊ، ئەشۊ گفتوگۊ سەرو ئینەیە بکەرمێ و چارەسەرش پەی بېزمێوە. ڕێکوزستەی پەروەردەی سەرو بنەماو مافی و مافو وەنای بە زۋانو ئەڎایی پېسە گرنگتەرین پرسی موینمێش."

جە بەردەوامی ئەرەیاۋناکەینە دەم پارتی واتش: "بەدی ئامای ئاشتی بە بنیاڎنیاو گلێرگێوە ئاشتییانەی مومکینا" و پەی ئینەیچ داواو دەس هۊرگېرتەیش جە جابەجاکەردەی و هەرمانەی دژە-دیموکراتیکی کەرد.

جە درێژەو ئەرەیاۋناکەینە ئامان: "پەی ئاشتی ئەشۊ ئاستەنگی ۋەرا ۋەر بە پېوەرە ژیۋای هاموڵاتی ئازاڎی بە کەلتوور و ناسنامەی جیاوازۊ هۊرگیریۊ. جیای چینەی هیچ ڕێوە تەر نیا پەی بنیاڎنیاو گلێرگەی دیموکراتیکی."

جە ئەرەیاۋناکەینە ئی داواکاریې وزیێنێ ڕووە:

-  ئەشۊ دەستوور بەگوېرەو بنەمای زانستی، عەلمانی، دیموکراتیکی و فرە زۋانی سەرجەنۊ هەموار بکریۊوە.

-  مافو وەنەی بە زۋانو ئەڎایی جە دەستووری بنەڕەتینە مسۆگەر بکریۊ.

-  ئەشۊ کۊتایی بە سیاسەتو نەژاڎپەرەسی، تاونایۊ و ئەوەمەڼەی بێ."