حۆت ڕې سەرەکیې کۊڵانەکاو شێخ مەقسوود و ئەشرەفیەی بە کۊڵانەکا تەرو حەلەبی پېوەس مکەراوە. هێزە چەکدارەکێ حکومەتو کاتیی بە نیایرەو بازگا و بەربەستو هەڕێ سەرو دووێ ڕې سەرەکیې، دوۍ ڕوێن گەمارۆ و هەردوو کۊڵانە کورڎنشینەکاو ئەشرەفیە و شێخ مەقسوودو شارو حەلەبیشا دان.

١و نیسانو ئېساڵی جە مابەینو ئەنجومەنو گرڏی کۊڵانەکاو شێخ مەقسوود و ئەشرەفیەی و نوێنەرا حکومەتو کاتیی جە حەلەبەنە، ڕێککۊتننامێوە سەبارەت بە هەردوو کۊڵانەکا ئیمزا کریا بې. جە چوارچێوەو بەندەکاو ڕێککۊتننامەکەینە، حۆت خاڵې وشگنای هامبەشې جە مابەینو هێزەکاو ئاسایشو گرڏی و هێزەکاو ئاسایشو دلېینەو هەردووی کۊڵانەکا سەرو ڕا سەرەکییەکا نیېرێ.

بەڵام چەکدارەکاو حکومەتو کاتیی ٧٧ جارې ڕێککۊتننامەکەشا پاشێل کەردەن؛ درۆنشا بەردەن سەرو هەردووە کۊڵانەکا، خەڵکی مەدەنی سەرو ڕاکاوە بڕفانریان، یاگە گشتییەکېشا پێسە ق نەوەشخانەی کەردێنێ بە خاڵې سەروازیێ.

دوۍ ڕوې چێوەڵیچ، چەکدارەکاو حکومەتو کاتیی خاڵې وشگنایش بیێرە. جە ئەنجامەنە چوارڕیانو لەیرەمونی ۋەرنیشتو شێخ مەقسوود و ئەشرەفیەی گیریان. هېزیچ چوارڕیانو جەندونی سەرنیشتو ۋەرکۊتوو هەردوو کۊڵانەکا گیریان و هەرمانو کارەکاو خاڵە پشکنینە هامبەشەکا سەرو هەردوو ڕاکا مردێنە.

بەمەڵامەتوو گېرتەی هەردووە ڕاکاوە، بەتایبەتی تڕۆمبێلێ و کرێکارێ ناچارې بیې ڕێوە تەرە گېرانە ۋەر، وەرو ئانەی هەردووی ڕاکې، ناوچەو کرێکارا جە دەورووبەرو کۊڵانەو ئەشرەفیەی، ناوچەو شقێفی پیشەسازی بە کۊڵانەو شێخ مەقسوودی و ناوچەکا تەریۆ پېوەس مکەراوە.

ئەنجومەنو گرڏی هەردووە کۊڵانەکا هېزی ئەرەیاۋنېوەشا وەڵا کەردۆ کە چنەشەنە ئامابې، ڕا بە ۋېیەرنای سووتەمەنی پەی هیچ کام چا دووە کۊڵانا نمەڎریۊ.