فیدراسیۆنو زامڎارا جەنگی پیلانگێڵنی ٩و تشرینو یوەمیشا شەرمەزارکەرڎ
فیدراسیۆنو زامڎارا جەنگو سەرنیشت و ۋەرکۊتوو سووریای بە ئەرەیاۋنېوە پیلانگێڵنی ٩و تشرینو یوەمیشا شەرمەزارکەرڎ.
فیدراسیۆنو زامڎارا جەنگو سەرنیشت و ۋەرکۊتوو سووریای بەبۆنەو ٢٧هەمین ساڵیادو پیلانگێڵنی مېیان دۆڵەتی ٩و تشرینو یوەمی، ئەرەیاۋنېوەش وەڵا کەردۆ.
جە سەرەتاو ئەرەیاۋناکەینە ماچۊ: “پیلانگێڵنی مېیان دۆڵەتی ٩و تشرینو یوومو ١٩٩٨ی کە جە کەسایەتی ڕابەر ئاپۆنە ۋەرانۋەر بە گرڎ گەلا ئازادیخوازا ئەنجامدریا بە تووڕەییێوە گۊرەو ڕووسیاوی و شەرمەزارش مکەرمێ. بە ڕێز و وەشەسیاییۊە سڵام جە ڕابەرایەتیما مکەرمێ کە ٢٧ ساڵې زیاتەر مڎرامانێوە بێهامتا مکەرۊ پەی کەردەیۊ ڕاو ژیۋایێوە ئازاڎی و ئی پیلانگێڵنیە شوومەیش بە ئیرادێوە بێهامتای ماڕان”.
جە ئەرەیاۋناکەینە ئاماژە پانەیە مکەرۊ، هێزە هەژموونوازەکې کە گەرەکشا بې ۋەرکۊتوو مېیامینی بەپاو مەسڵەحەتەکا وېشا مچاراوە، ڕابەر ئاپۆ و تەڤگەرو ئازادییشا پێسە و ئاستەنگێوە ۋەر وېشانە وینا، پۆکەی پیلانگێڵنیشا ئەنجامدا، ڕابەر ئاپۆیچ جە ١٥و شوباتو ١٩٩٩ی ڕادەسو دۊڵەتو تورکی کریا.
هەرپاسە ئەسرار کریانۆ کە ڕابەر ئاپۆ ۋەرانۋەر بە گرڎ پلانەکا دیلگېرتەی و تەسفیە و گۆشەگیری، مڎرامانێوە گۊرەش کەردەن، ماچۊ: “بە ئەوەکۊشایێوە بێوێنە، حەقەتێوەش پەی ئینسانیەتی و ژیۋای ئازاڎی وستەڕووە. ۋەرانۋەر بە سیستەمە ۋنی مژەکانە؛ تاواش گلێرگێوە ئەخلاقی و ڕامېیاری، پارادایمو ئیکۆلۆژیی و دیموکراتیک و ئازادیوازیی ژەنی پێشکەش بە ئینسانیەتی وەڵېکۊتەواز بکەرۊ”.
فیدراسیۆنەکە ئەسرار مکەرۊ کە ئیساتې بەرەو ئازادیی بەڕوو گەلو کورڎی و گرڎ گەلانە کریانۆ، ماچۊ: “گرنگ ئانەنە بە جۆش و پاگیریێوە گۊرە بەشدار بیمێ جە پڕۆسەو ئاشتی و گلێرگەو دیموکراتیکی کە بە سەرمەشقایەتی ڕابەرایەتیما ملۊڕاوە”.
جە کۊتایی ئەرەیاۋناکەینە قەول مڎۊ: “قەول بە گەشمەرڎا مڎەیمێ دەسکەوتەکاما بپارێزنمێ، ڕابەرمان ئازاڎ بکەرمێ، ۋنەپەرسایۊی جە پیلانگێڵنییەکا بکەرمێ و جە وڵاتێوە ئازاڎەنە سەرمەشقایەتی پەی تەمامو گەلا هەرێمەکەی و جەهانی بکەرمێ”.
