ڕێکوزیا عەلەوییەکاو تورکیای ناڕەزایەتیشا دژ بە کۊمکوژی سەرو عەلەوییەکاو سووریای بەربڕی و واتشا: "ئانەی سەرو عەلەوییەکارە مێ، کەربەلای دووەما. یەزید هەممان یەزیدا، ستەمونە کریاچ هەممان ستەمچنە کریان. هەتەشە کوشۆنە، ئاکەپە هامبەشا."
چەنڎین ڕێکوزیایې عەلەوییې دژ بە کۊمکوژی و ستەمەکاو سەرو عەلەوییەکاو سووریای، کە جە لایەنو چەکداراو حکومەتو ڕاگوزەرو سووریای ئەنجام مڎریۊ، جە شارو ئەستەنبوڵینە ئەرەیاۋنېوە هامبەششا وەناوە، کە هامواتەواچو هەدەکەی، عەلی کەنعانئۆلووچ چنەشەنە بەشدار بی.
جە گلېرۊبیەکەنە لافیتەو "جە سووریا عەلەوی کۊمکوژ مکریۊ"، "ئی سیستەمە جە کەربەلا و دماتەریچ خراپتەرا" و "مافو هامووڵاتی بییەی ئازاڎما گەرەکا" بەرزې کریێوە. هەر جە چالاکییەکەنە درووشمۊو "هەتەشە بکوشا، ئاکەپە هامبەشا" وچیاوە.
ئەرەیاۋنا هامبەشەکە جە لایەنو ئەندامو دەسەو ڕاوەبەری فیدراسیۆنو عەلەویی بەکتاشی، سەڤیم یالنجاکۆئۆغلووەوە ونیارە و ئاماژەش بە ئا ستەمەو سەرو عەلەوییەکاو سووریای کەرڎ و واتش: "ئانەی جە ئیسەنە سەرو عەلەوییەکارە مێ، کەربەلان. یەزید هەممان یەزیدا، ستەملێکریاچ هەممان ستەملێکریان. هېزی گەل جە لازقییە، حەما و حومس دژ بە ستەمی مچیێ مېڎانەکا. چېوە پەشتیوانی جە گەلی مکەرمێ. پەنەوازا جۆلانی و چەکدارەکېش دادگایی بکریا. کوشتەی کەسی بێتاوانی جە ویر نمەکەرمێ و مبیمێ بە دەنگشا و ڕەوایەتی بە جۆلانی نمەڎەیمێ."
