محەمەد مەلیح گوڵسەرەنی، نوێنەرو جەمەو پارێزنەرا جە کۆمیسیۆنو پەرلەمانینە، قسېش کەرڎې و واتش: "بە پەیلوای ئێمە هەموارکەردە سەرەتاییەکا ئەشۊ متمانە بە گلێرگەی بڎا، وەڵې گرڎ چېوێنە پەنەوازا مافە کۊمەڵایەتییەکا هەموارۍ کریاوە".
کۆمیسیۆنو دیموکراسی، واڵە-برایەتی و یۊییەی نەتەوەیی” کە پەی چارەسەرو پرسو کورڎی ئەرەمەرزیان، سیازدەهەمین کۆبوونەوەو وێش بەرۆڕاوە.
محەمەد مەلیح گوڵسەرەنی، نوێنەرو جەمەو پارێزنەرا کە جە گلێرۆبییەکەیەنە قسېش کەرڎې، جەختش سەرو گرنگی ڕاو جایې متمانەپەنەکریا و ڕێسای یاسایی پەی سەرکۊتەی پرۆسەکەی کەردۆ.
گوڵسەرەنی ئاماژەش پانەیە دا کە لوایۊپۊرەی یاساکا پێس و یاساو جابەجاکەردەی و یاساو ۋەرەنگاربییەیۊ تیرۆری پەنەوازا بوزیۊ ڕۆژەڤۊ و یاڎش ئارڎۊ کە کودەتاو ١٢و ئەیلولی زیانش بە پێکئامای دیموکراتیک و کۊمەڵایەتی یاونان.
گوڵسەرەنی ئەرەیاۋناش: "جە سەرەتاو ئەرەمەرزنای کۆمارینە، دیموکراسی ئێمە نەبی بە ئامرازێوە ڕاوەبەری کە گرڎ هاموڵاتیێوە درک کەرۊ هینو وێشق، کودەتا و لێکەوتە وېرانکارییەکاو ڕژێمە سەروازییەکا زووەن ڕاشا جە یۊبیەو مابەینو دۊڵەتی و خەڵکی گېرتەن."
گوڵسەرەنی بە جەختکەردەیۊ سەرو ئانەی کە ئی پرۆسە ئەشۊ سەرو بنەماو “ڕاستگۆیی" بەردەوام بۊ، ئەرەیاۋناش کە تاقە پێکئامای دۊڵەتی هێڵەی سوورەنە.
گوڵسەرەنی بە جەختکەردەیۊ سەرو گرنگی بەشداریکەردەی گلێرگەی چی پرۆسەنە و ڕێنماییکەردەیش بە دەروونناسیێوە هامبەش، ئەرەیاۋناش: “بە عالش مزانو ئا نەخشەڕایەی کە جە لایەنو کۆمیسیۆنی ئامادە مکریۊ،. چنی بەردەوام بییەیما جە پرۆسەکەنە، ئەشۊ شێوازو کاریگەری و چارەسەری کۆنکرێتی پێشکەش بکریۊ."
هەرپاسە گوڵسەرەنی ئاماژەش پانەیەچ کەرد کە پەنەوازا ڕێکارو یاسایی دژ بە کردەوە و پۆستە هاندەرانەکا بنیۊرە و ئەگەر پەنەواز سزا دیاری بکریۊ سزا دریۆ. هەرپاسە پێشنیارش کەرد کە پەی ئانەی متمانە گەشە کەرۊ پەنەوازا بتاویۊ کورتەنامەو زانیاری بە زۋانو کوردی کیانا.
ئاماژەش پانەیەچ کەرد کە پەیلوای ئێمە ئانەنە کە جە قۆناغو یووەمینە پەنەوازا پەرەپنەدای بە ڕێساکا متمانە پەی گلێرگەی گێڵنۊوە، هەرپاسە سەرەتا ڕێساکاو پېوەس بە مافە کۊمەڵایەتییەکا جابەجا کریا، جگە چانەیە پەنەوازا ڕێساکې پێسە و یاساو جابەجاکەردەی سزاکا و یاساو ۋەرەنگاربییەیۊ تیرۆری بوزیانە ڕۆژەڤۊ.
جە کۊتایینە، گوڵسەرەنی جەختش سەرو گرنگی وەڵېکۊتەی پرۆسەکەی سەرو بنەماو یاسا و دادپەروەری کەردۆ و واتش: "سەرکۊتەی نەک تەنیا بە ئیرادەو سیاسی، بەڵکوم بە دەسەبەرکەردەی سەروەری یاسێ، ماف و ئازاڎییە بنەڕەتییەکا، هاموەخت چنی پێشوازی گۊرەو گلێرگەی مکریۊ."
