حکومەتو کاتی سووریای بڕیارنامەو ژمارە ١٨٨و ساڵۊو ٢٠٢٥ی تایبەت بە ڕوان و جەژنە فەرمییەکا بەرکەرڎ. جە بڕیارنامەکەنە ژمارێوە فرە جە ڕۆ و جەژنەکاو گەلو کورڎی و گەلا تەرو سووریایش پەشتەگۊش وستێنێ و هۊرڕشکنێوە. پێکئامایەکې سووریای ۋەرا ۋەر پی بڕیاریە تووڕەیی وېشا بەربڕی و ئەرەیاۋناشا کە ئینە درێژکەردەیۊ هەمان ڕاو دوورۋستەیۊ و پەشتەگۊش ۋستەین کە ڕژێمی وەڵین پەیڕەویش کەرې.

جە بڕیارنامەکەنە ڕۊو ٢١و ئازاری کە جەژنۊو نەورۆزینە، دیاری نەکریان و جە یاگێ ئاڎینە قەرارەکەو ڕژێمو وەڵینو بەعسی جابەجا کریان کە ٢١و ئازاریش پېسە ڕۊو ئەڎایی دیاری کەردەبې.

نەورۆز پەی گەلو کورڎی جە سووریانە و فرەو ناوچەکاو کورڎەسانینە جەژنێوە نەتەوەیی پیرۆزەنە، و جە فرێوە جە وڵاتانە پېسە ئێران، ئەفغانستان، ئازەرباینجان و وڵاتاو ئاسیای مېیامینینە پیرۆزە مکریۊ.

یونسکۆ ساڵۊو ٢٠١٠ی دڎانش بە نەورۆزیرە نیا و وستش لیستو کەلەپوورو فەرهەنگو ئینسانیەتیۊ، و ٢١و ئازاریش پېسە ڕوێوە مېیاڼەتەوەیی پەی پیرۆزکەردەی دیاری کەرد.

سەرەڕاو ئی دڎانیایپۊرە جەهانیە، حکومەتو کاتی جە سووریانە شۊنپاو ڕژێمو وەڵینو سووریایش هۊرگېرتەن. ڕژێمی وەڵین ساڵۊو ١٩٨٨ی بڕیارنامەو ژمارە ١٠٤یش بەرکەردەبې و ٢١و ئازاریش پېسە "ڕۊو ئەڎایی" دیاری کەردەبې.

جە بڕیارنامە تازەکەنە جەژنۊو ئەکیتۆی، کە جەژنۊو نەتەوەیی سوریانی، ئاشووری و کلدانییەکانە و گرڎ ساڵێوە جە ١و نیسانینە پیرۆزە مکریۊ و یۊ جە قەڎیمیتەرین جەژنەکاو تاریخو ئینسانیەتینە، پەشتگۊش وزیان.

حکومەت هەرپاسە چنڎین جەژنې نەتەوەیې تەرې سووریایچش پەشتگۊش ۋستێنێ، بەتایبەتی ڕۊو گەشمەرڎا، کە جە ٦و ئایارینە یاڎش کریۊوە، ئا ڕووەی کە عوسمانییەکې ژمارێوە فرە جە ڕۆشنۋیرا و چالاکوانا سووریایشا جە مېڎانو مەرجەو دیمەشقینە جە دار دێنێ.