کۆمیسیۆنو ژەناو ئەنجوومەنو پارېزنای نیشتیمانی ئێرانی جە گوزارشتێوە وېشانە سەرنجش وستەن سەرو جەداردای ژەنا جە ماوەو نۆ مانگا ۋېیەرڎەینە و بەگوېرەو گوزارشتەکې، جە ماوەو نۆ مانگا ۋېیەرڎەېنە جە ۋەرکۊتوو کورڎەسانی و ئێرانەنە هەزار و ١٧٥ کەسې جە دار دریێنێ، کە ٣٨شا ژەنینێ.

جە گوزارشتەکېنە باس چانەیە کریان، کە تەنیا جە مابەینو ٣٠ی تەممووزی و ٣٠ی ئەیلولینە ١٤ ژەنی جە دار دریێنێ. ئاماژە پانەیچە کریان، کە فرەبییەی جەداردای ژەنا، مەرام چنەش تەرسنای گلێرگەین، کە چنەشەنە ژەنی هەمیشە سەرمەشقایەتی سەرھۊردایەکا مکەرا.

بەگوېرەو زانیارییەکا، جە ساڵەکا ۋېیەرڎەینە ژمارەو ئا ژەنا کە جە ۋەرکۊتوو کورڎەسانی و ئێرانەنە جە دار دریێنێ پی جۊرەنە: ساڵۊو ٢٠٢٢ې، ١٥ ژەنی، ساڵۊو ٢٠٢٣ې ٢٦ ژەنی، ساڵۊو ٢٠٢٤ی ٣٤ ژەنی و جە ساڵۊو ٢٠٠٧یۊ تا ئیسە فرەتەر جە ٣٠٠ ژەنا جە ۋەرکۊتوو کورڎەسانی و ئێرانەنە جە دار دریێنێ.