شیاوو باسیا کۆڵبەرې جە ناوچە سنوورییەکاو ۋەرکۊتوو کورڎەسانینە بە شېوازێوە گرڎی ڕووبەڕوو تنوتیژی هێزە چەکڎارەکاو ئێرانی مەباوە و چا چوارچېوەیچەنە، ئارۆ کۆڵبەرێوە کورڎو خەڵکو بانەی جە لایەنو هێزە چەکڎارەکاو ئێرانیۊ کوشیا.

کۆڵبەرنیوز سەبارەت بە کوشیای کۆڵبەرێوە کورڎی جە ۋەرکۊتوو کورڎەسانینە پی جۊرە زانیاریێش وستەن ڕووە.

جە هەواڵەکەنە ئامان، سەرسەعبو ئارۆی کۆڵبەرێوە کورڎ بە نامې مەهدی شەریفی، خەڵکو دەگاو کانی سێوې سەر بە شارو بانەو ۋەرکۊتوو کورڎەسانین، جە سنوورو ناوچەو سارداوو شارەکەینە بە تەقەی ڕاسەوخۆو هێزە چەکڎارەکاو ئێرانی کوشیان.

ئاماژە پانەیچە کریان، تەرمو ئا کۆڵبەرەیە پەی خەسەخانەو سەڵاحەدینی ئەیوبی شارو بانەی فاڕیانۆ و تا ئیسە ڕادەسو بنەیانەکەیش نەکریانۆ. شیاوو باسیا مەهدی شەریفی تاتەو زاوڵێوەن.

بەگوېرەو سەرچەمەکاو کۆڵبەرنیوزی، جە شش مانگې یووەمو ئېساڵینە جە ۋەرکۊتوو کورڎەسانینە ١٧ کۆڵبەرې کورڎې کوشیێنێ و ٢٠ کۆڵبەرې تەرېچ زامڎارې بیێنێ.

شیاوو ئاماژە پنەکەردەیا، هێزە چەکدارەکې ڕژێمو ئێرانی بە بەهانې "ۋەرەنگاربیەیۊ قاچاخچیەتی" تەقە جە کۆڵبەرا مکەرۊ، کە تەنیا ساڵۊو ۋېیەرڎەینە جە ۋەرکۊتوو کورڎەسانینە ٥٢ کۆڵبەرې کورڎې کوشیێنێ و ١٣١ کۆڵبەرې تەرېچ زامڎارې بیێنێ.