ئەندامۊو کۆردیناسیۆنو جەمەو جوانا، لێگەڕین ئارتەمەتانە، سەرنجش وست سەرو بانگەوازو 'گێڵایۊ'و ڕابەر ئاپۆی کە داواو گێڵایۊیش جە تاراوگۊ پەی وڵاتی کەردەبې، واتش: "ئەشۊ گرڎ جوانێوە کورڎەسانیی بە شکۆوە گێڵۊوە سەرو خاک و چاند و زۋانو وېش."
ئەندامۊو کۆردیناسیۆنو جەمەو جوانا، لێگەڕین ئارتەمەتانە، پېخامێوە ڤیدیۆییش ئاراسەو جواناو کورڎەسانی کەرد و ئاماژەش بە سیاسەتەکاو کۊچبەرکەردەی کەرد کە ئەرەگیرې جە هەر چوار پارچەو کورڎەسانینە ڕاوەبەرش مکەرا و واتش: "ئەشۊ کۊتایی بە سەروەری و نۊکەری بارمێ جە وڵاتەکەمانە. پېسە جوانا، چنی ڕابەری ئازاڎی، جە وڵاتێوە ئازاڎەنە بژیۋمێ."
پېخامەکەو لێگەڕین ئارتەمەتانې بە پوختی پی جۊرەنە:
لێگەڕین ئارتەمەتانە،دەسپێکو قسەکاشەنە واتش،" جە کەسایەتی هەڤاڵ ڕەزای، ڤەژین زەریان، ئەمینە ئەرجیەسې، ڕۆهات ڕۆڤەرې و چیا ڕزگارینە بە ڕێز و شکۆمەڼیۊ یاڎو گەشمەرڎاما مکەرۊوە و قەول مڎەیمې مەرامەکاشا بیاونمې بە سەرکۊتەی".
لېگەڕینە سەرنجش وست سەرو ئازاڎیی ڕابەر ئاپۊیی و واتش،" جە وەختێوەنە کە ڕابەر ئاپۆ دەسپنەکەر و نوێنەرو پرۆسەو ئاشتی و گلێرگەو دیموکراتیکین، پۆکەی ئازادی ئاڎی و ژەنا و جوانا و گەلا چېردەسی، بە ئازاڎی بەڎەنی ڕابەر ئاپۆیۊ بینیان."
'ڕابەر ئاپۆ دەسوەڵېوستەیێوە تاریخیش کەرد'
لێگەڕین ئارتەمەتانە جەخت چانەیە مکەرۊوە کە جواناو کورڎەسانی جە ڕاو ڕابەر ئاپۆیۊ بییەی وېشا ئەژناسان و زۋان و کەلتوورەکەشا زیڼە ڕاگێرتەن. بە سەرنجدای سەرو سیاسەتو سیستەمو سەرمایەداری کە گەرەکشا کۊمکوژی و سەرجە نۆ متەیرەیۊ ۋەرکۊتوو مېیامینی درێژە پنە بڎۊ، ئاژەو سووریا و غەززەی بەڵگەو ئا نیازەو تورکیاین کە گەرەکشا هەمان ئاژە سەرو کورڎەسانیرە بې. ڕابەر ئاپۆ بە درک کەردەی بە ئی مەترسییە تاریخیەیە، دەسوەڵېوستەیێوە تاریخیش کەرد.
'سیاسەتەکاو کۊچبەرکەردەی و تاڵانکەردەی جە کورڎەسانەنە'
لێگەڕین ئارتەمەتانە ئاماژە بە سیاسەتە ٢٠٠ ساڵیەکەو نکۊڵیکەردەی، دلېنەبەردەی و قڕکەردەی جە کورڎەسانەنە مکەرۊ، کە چنەشەنە ژیۋگەو کورڎەسانی سۊچۊنە و تاڵان مکریۊ، هەرپاسە بەها ئینسانی و کۊمەڵایەتییەکې ڕوو بە ڕوو قڕکەردەی کەلتووری مکریاوە. مەرامو ئینەیچ دەس سەرەرەگېرتەی بەهاکاو وڵاتین و تاڵانکەردەیشانە، هەرپاسە کەردەی کورڎەسانی بە دۊزەخێوە کە ژیۋای چنەشەنە دلېنەشیەن. بەتایبەتی بە ڕێبازەکاو جەنگی تایبەتی کۊشش مکەرا ڕەوایەتی پی هووروژما بڎا.
لێگەڕین ئارتەمەتانە ئاشکراش مکەرۊ کە یۊ جە مەرامەکا تەرو ئی جەنگ و کۊمکوژیا، ئەرەبڕیای گەلین جە خاکی و کیاستەیشا پەی جبەری بەرەو تاراوگە. ئی سیاسەتە جە سەرنیشتو کورڎەسانی (بەتایبەتی جە ۋەرکۊتوو فوراتی، مەرەش، مەلەتی، سەمسور و دەرسیم) ڕاوەبەر کریان و دەگاکې ئێرشا وەردریانەنە و کوێسانەکې قەڎەغې کریێنێ. جە ۋەرنیشتو کورڎەسانی (عەفرین، سەرېکانی و گرێسپی) خەڵک کۊچبەر کریان و جە پانشتو کورڎەسانی (بادینان)یچ خەڵک بەمەڵامەتوو فشارو دۊڵەتو تورکی دەگاکېشا چۊڵې کەردېنێ. جە ۋەرکۊتوو کورڎەسانیچ بەمەڵامەتوو سیاسەتو جەداردای ئێرانی، جوانې ناچارې بیێنێ کۊچ بکەرا پەی ئۊرووپای.
لێگەڕین ئارتەمەتانە ئەسرارش مکەرۊوە کە پی سیاسەتاو کۊچبەرکەردەی، سەڎان گلێرگې، چاند و زۋانې دلېنەشیێنێ و کۊچکەردەی بەرەو ئۊرووپای ژیۋایێوە عالتەر نییا، بەڵکم تاونایۊێوە پی شکڵەنە کە ئینسان جە ڕێخە و ڕیشەو وېش ئەرەبڕیۊ. جەختیچ چانەیە مکەرۊوە کە پەنەوازا جوانې گەشمەرڎا بشناسا، کە بە ۋنەو وېشا خاکو وڵاتیشا ئاوەڎان کەردەنۊ.
"پەنەوازا وڵاتەکەیمان پەی دەسەڵاتدارا جیانازمې"
لێگەڕین ئارتەمەتانە، ۋەرپەرسۊو "تەڤگەرو جوانا ئاپۆیی"، بانگەوازێوش ئاراسەو جواناو کورڎەسانی کەرڎ و جەخت سەرو پەنەوازی مەنەیۊ جە وڵاتەنە و بەشداری جە ئەوەکۊشاینە کەردەنۊ. ئارتەمەتانە ئاماژە پانەیە مکەرۊ کە هەر کۊچبەریێوە پېسە سەرکۊتەیێ پەی دژمنی تەماشە مکریۊ مەنەیۊ جە جبەرو وڵاتیچنە ڕا گێرۊنە جە جابەجاکەردەی ئەرکە نیشتمانییەکا.
جە پېخامەکەشەنە، لێگەڕین ئارتەمەتانە بانگەشەو ئانەیە مکەرۊ کە پەی ژیۋایێوە ئازاڎانەو ژەنا، زاوڵا و جوانا، پەنەوازا فەلسەفەو "ئاپۆیی"ی گیریۊنە ۋەر و بەشداری جە ژیۋای ئازاڎەنە بکریۊ. ئاڎە ئەوەکۊشای ٥٢ ساڵەو ڕابەر ئاپۆی پەی ئاشتی، بنیاڎنیاو ئیرادەی و هۆشیاری تاریخی بەرز نرخنۊ، کە مەبەسش ژیۋای ئازاڎانەو کورڎی و پارېزنای زۋان و کەلتوورەکەیشا.
"جە وڵاتێوە ئازاڎەنە چنی ڕابەرێوە ئازاڎی بژیۋمێ"
ئارتەمەتانە باس چانەیە مکەرۊ کە خاوەنداریکەردەی جە قەبرسانایچ نیشانې دڵسۆزیین پەی وڵاتی و پرسیارە جە بارەو دیارنەمەنەی قەبرەو گەشمەرڎا پېسە شێخ سەعیدی و سەید ڕەزای مکەرۊ، هەرپاسە ڕاگېرتەی جە گێڵنایۊ قەبرۊو گەشمەرڎا پەی کورڎەسانی بە حەقەتێوە ڕۊشن مزانۊ.
لێگەڕین ئارتەمەتانە داوا جە جوانا مکەرۊ هەڵوێسێوە بنەڕەتی برمانا و جە قسەکې ڕابەر ئاپۆی بیاوانە کە واتەنش: "جیای ئانەی ڕووە بکەروو ئۊرووپا، جە ئیمراڵینە مەنووە." ئی قسې بە گرنگ منیۊرە پەی یاواینە چانەی کە کۊچکەردەی پەی وڵاتێوە تەری بە ماناو ئازادی نمێ.
بانگەوازو تەڤگەرو جوانا ئاپۆیی
جە کۊتایینە، "تەڤگەرو جوانا ئاپۆیی" بانگەوازێوە گرڎیی ئاراسەو جواناو کورڎەسانی مکەرۊ کە گۊش جە بانگەوازەکەو ڕابەر ئاپۆی گېرا، کە "بانگەوازو گێڵایۊین پەی سەرو خاک، وڵات، چاند و زۋانو وېتا." داواشا ۋنە مکەرۊ پېسە جوانە شکۆمەڼا جە وڵاتێوە ئازاڎەنە چنی ڕابەرێوە ئازاڎیی بژیۋا، چونکی ڕوێوە ژیۋای ئازادی، سەنگینتەرا جە سەڎساڵا ژیۋای کۆیلەیی."
پېخامەکە بە درووشمۊو "بژیۋۊ سەرۆک ئاپۆ"ی کۊتاییش مێ.
