جوانې ئەندامو حزبو شیوعی کورڎەسانی و حزبو سۆسیالیستو کورڎەسانی، جە هەرێمو کورڎەسانیۊ یاوې ئەنقەرە. جوانې سەرنیشتو کورڎەسانی چنی ئەنداماو ئەنجوومەنو جوانانو پارتو یەکسانی و دیموکراسیی گەلا (دەم پارتی) پەی لوای پەی ئیمراڵی و ویناو ڕابەر ئاپۊی، داواکاریشا پېشکەش بە وەزارەتو داڎو تورکیای کەرڎ. وەڵتەرې جە سەرۋنەدای وەزارەتی، جوانەکې جە مېیانگەو گرڎیی دەم پارتینە چەمشا کۊت بە پەرلەمانتارا دەم پارتی نەورۆز ئویساڵ ئاسڵانې. دماتەر لوا پەی وەزارەتو دادی و پەی وینای ڕابەر ئاپۊی، داواکاریشا پېشکەش بە وەزارەتەکەی کەرڎە.

جوانێ وەڵێ پېشکەش کەردەی داواکارییەکەی، ۋەرڎەمو وەزارەتو دادینە کۆنگرێوە ڕۊنامەوانیشا بەست، پەرلەمانتارا دەم پارتی ئویساڵ ئاسڵانە جە کۆنگرە ڕۊنامەوانییەکەنە ئامادە بې.

ئەندامو ئەنجوومەنو جوانانو دەم پارتی، ڕێزان کاگان‌ئەرسەلان سەرەتا قسەش کەرڎې.

دماتەر جە حزبو زەحمەتکێشانو کورڎەسانی، شکۆ شوان ئەرەیاۋناش کە ئاڎې پەی پشتیگیری جە پرۆسەو ئاشتی ئامێنې، واتش: "ئێمە پەی پشتیگیری جە پرۆسەو ئاشتی و ئاگاداربییەی جە ئاژەو ڕابەر ئۆجالانی و یاونای پشتیگیری خەڵکو سەرنیشتو کورڎەسانی، گەرەکمانە بلمێ پەی دوورگەو ئیمراڵی و دیڎار چنی ڕابەر ئۆجالانی ئەنجام بڎەیمێ. گەرەکمانە ڕابەر ئۆجالان ئازاڎ بۊ".

جە حزبو سۆسیالیستو کورڎەسانی، سالار عەبدولڕەحمان ئەرەیاۋناش کە نەتەوەو کورڎی، نەتەوەێوە ئاشتیوازا، واتش: "چی  ڕووەنە چەنڎین سەرۋنەدایما ئەنجام دێنې. پی سەرۋنەدایا گەرەکمانە نیشانە بڎەیمێ کە کورڎ گەلێوە ئاشتیوازا. گەرەکمانە دیڎار چنی ڕابەر ئۆجالانی ئەنجام بڎەیمێ و پشتیگیری جە پرۆسەو ئاشتی بکەرمێ. گەرەکمانا وڵاتەکەما ئازاڎ بۊ و گرڎ کەس دلې ئازاڎی و ئاشتی و پێوەرەی بژیۋا".

دماتەر شاندو جوانەکا و نەورۆز ئویساڵ ئاسڵانې، پەی ئەنجامدای دیڎاری چنی ڕابەر ئاپۊی، داواکاریشا پېشکەش بە وەزارەتو دادی کەرڎە.