سەرۆکو گرڏی پارتو ئینسانی و ئازادی (PIA) ئەحمەد کایە جە ڕاو ئاژانسەکەیمارە هۊرسەنگنایش پەی پرۆسەو ئاشتی و گلێرگەو دیموکراتیکی کەرڎ و ئاماژەش پانەیە کەرڎ کە پېوەس بە مەڵامەتەکاو ئی پرۆسەیە جە وەڵینی جیاوازتەرا، بەڵام بە چڕی سەرو بنەماو ئەنقەرەیۊ ملۊڕاوە، نیازەکېش ڕۊشنې نییەنێ؛ جە ئی مژارەیەچنە دەرەنجامە گریمانییە نەرێنییەکې ئی هۆشیارییەما پنە مڎا. کایە واتش: “ئی پرۆسەیە مەڵامەت و فاکتەرە جبەرییەکې بیێنێ بە هەڵسوڕێنەرش. جە پرۆسەو ئیسەینە کاریگەریی پەیوەندیی جبەری فرەتەر وەرچەما. دماو ١٥و تەمموزی، بە نامێ ‘پرسو هەمیشەیی’ دۊڵەتی و نیگەرانییەکېش سەبارەت بە ئاسایشی بیۍ بە هێزو بزوێنەرو ئی پرۆسەیە.”

‘پرۆسەکە فاڕیا پەی بیرۆکراتیکی’

کایە ئاماژەش پانەیە کەرڎ خاڵەی دووەمە و جیاوازی ئی پرۆسەیە ‘ڕۊنی و شەفافییەت’ بې، پرۆسەکە پەی گرڎو گلێرگەی شیکریاوە، بەڵام جە ئیسەنە پرۆسەکە سەرو بنەماو بیرۆکراتیک و مەرکەزیەتو ئەنقەرەیۊ ملۊڕاوە.

‘دەورو ئۆجالانی گرنگ و کاریگەرتەر بییەن’

کایە سەرنجش وست سەرو دەورو ئیسەو ڕابەر ئاپۆی و واتش: “عەبدوڵا ئۆجالان جە مژارو کۊتایی ئاردەی بە ئەوەکۊشای چەکداری و بنەما و سیاسەتو کورڎینە کاریگەریی بنەڕەتیش هەن و ئینەیچ جە خودو وېشەنە نامنشین بییەن. پۆکەی پەنەوازا بە شێوەیێوە چالاک بتاوۊ بەشدارو پرۆسەکەی بۊ. ئاڎ بە ئەنجام یاونای پرۆسەکەیش جە ئازادی کەسیی وېش بە گرنگتەر موینۊ، بەڵام پەنەوازا هەلومەرجو ڕاوەبەردەی پرۆسەکەیش پەی بڕەخسیۊ. ئینە داواو گەلو کورڎین و مەرجو بەشداربییەی کاریگەرش جە پرۆسەکەنە و بە دڵنیاییۊ ئەشۊ بڕەخسیۊ. بێگومان پێکئامای مافو هیوای و هەموارکەردەیۊ یاسایی پەی پرۆسەکەی گرنگ و کاریگەرېنێ.”

کایە دەسنیشانش کەرڎ ئەشۊ ئاژەو زینانیەکا فاڕییایش سەرەرە بێ و گرڎ بە یاسا چارەسەر بکریۊ و ئاماژەش پانەیەچدا ئا کەسې کە چەکشا سۆچنا و یا چەکشا هۊرگېرتەن پەنەوازا بە یاسا ئاژەشا دیاری بکریۊ و ئینەیچ گەرەنتی یاساییش پەنەوازا. هەرپاسە پېوەس بە گەلو کورڎی ئاماژەش پانەیە کەرڎ ئەشۊ کورڎێ هەمیشە داواکارییەکېشا جە ڕېوە ئەوەکۊشای سیاسی و فشاری کۊمەڵایەتیۊ جە ڕۆژەڤەنە بازاوە.

‘جە مژارو ۋەرنیشتینە هۆشیاری و سەرنجدای پەنەوازا’

سەرۆکو گرڏی پارتو ئینسان و ئازادی (PIA) ئەحمەد کایە جە کۊتایی قسەکاشەنە سەرنجش وست سەرو هەستیاری پرسو ۋەرنیشتو کورڎەسانی و دەسنیشانش کەرڎ تورکیا ئەرێ کەردەی هێزە مېیاننەتەوەییەکاش قواستەنۊ پەی دەسوەڵېوستەی جە سووریانە، گەرنا چېوەکە تاکلایەنە نییا و واتش: “پەنەوازا پەرە بە پەیوەندییەکاو مابەینو کورڎی و ئۊرووپا و ئەمریکای بڎریۊ و بەهێزتەری کریانە. جیای ئانەی کە گنۊ چېرو پروپاگەندەکاو تورکیایۊ کە مەرامش ڕاو گرڎی کورڎی دلېینەین، ئەشۊ پەیوەندیێوە بەهێز سەرو ئاستو مېیاننەتەوەیی بنیاڎ بنیۊ.”