تەڤگەرو چاند و هونەری دیموکراتیکو میزۆپۆتامیای (تەڤ-چاند)، سەبارەت بە کۆنسێرتەکەو هونەرگەو وڵاتی کە جە زانکۆو ئەمەریکینە جە شارو سلێمانی پانیشتو کورڎەسانی ئەنجامشا دا و جە لایەنو کەسانې لایەنگرې و پەشتیوانې داعشیۊ کاروەدایش چنەکۊتۊ، ئەرەیاۋنېوەش وەڵا کەردۆ.

ئەرەیاۋناکە ۋەردەمو مېیانو تەڤ-چاندینە جە شارو قامیشلۆی بە ئامادەبییەی ئەنداماو تەڤ-چاندی و هونەرگەو وڵاتی جە لایەنو زۆزان برکۆیې، ئەندامۊو وەشانی شلێرێوە ونیاوە.

زۆزان برکۆیە ئەرەیاۋناش، "ساڵۊو ٢٠١٢ی گەلو ۋەرنیشتی دژ بە ڕژێمو بەعسی دەسشا بە ئەرەپڕای کەرد، پی ئەرەپڕایە گەل یاوا بە ئازادی، تنڎڕەوتەرین و تاریکتەرین جمېیەرې بە ڕابەرایەتی چەتەکاو داعشی بە پەشتیوانی هێزە هەرێمییەکا ڕووەشا کەردە ۋەرنیشتو کورڎەسانی و پەی یووەمین جاری جە تاریخو ئینسانیەتینە، هووروژمێوە دڕندانە سەرو گەلی پی جۊرە ئەنجام دریا".

واتش: "بە سەرکردایەتی ژەنا کورڎی، کناچې و کوڕەکاما، مڎرامانێوە تاریخی دەسش پنە کەرد و بەشېوازێوە قارەمانانە تاویا داعش مەڕیۊنە، ئی هووروژمې تا ئارۆیچ بەردەوامېنێ، کناچې و کوڕەکېما ڕوانە گەشمەرڎې مەبا."

ئاماژەش پانەیچ کەرد، "گەل ساڵانێوەن ۋەرا ۋەر بە قڕکەردەی و ستەمکاری هەرمانە پەی بنیاڎنیاو ژیۋایێوە ئازاڎی مکەرۊ، هەرپاسە بەرهەمە کەلتووری و هونەرییەکېچ بە ڕێکوستەی گەلاو ناوچەکەی و گرڎو پێکئامایەکا، بە سەرمەشقایەتی ژەنا، پرۆسێوە تازەو ڕۆشنۋیری و هونەری یان شۆڕشو ڕۆشنۋیریی دەسشا پنە کەرد، جە ماۋێوە فرە کوڵەنە، ئەوەکۊشای کەلتوور و هونەری، بەتایبەت ئانەی پەی ژەنا ئێزدی، ئېش و قارەمانێتی ژەنا کورڎیشا جە گرڎو جەهانینە ئەژناسان، چی بەرهەمە تاریخیانە ئەرەمەرزیا فەرهەنگی و هونەرییەکېما گرنگتەرین دەورشا گێڵنا، مېیانو هونەرگەو وڵاتی بەتایبەتی دەورێوە تاریخیش گێڵنا بە خوڵقنای هونەرو کۆمیناڵی، بە بەرهەمئاردەی چنڎین بەرهەمې هۆشیاریې بییەن بە دەنگ و ڕەنگو گلێرگێوە ئازاڎی."

ئانەیچش وست ڕووە، "چی دماییانە سەرو داواو ئەرەمەرزیا کۊمەڵایەتییەکاو پانیشتو کورڎەسانی، هونەرگەو وڵاتی کۆنسێرتێوە کاریگەرش جە شارو سلێمانینە ئەنجام دا، جە کۆنسێرتەکەنە سەمایێوە بە نامې "ڤەژین"ی نمایش کریا، کە سەرنج موزۊنە سەرو ئېش و مەینەتی و ڕزگاری ژەنا ئێزدی و گرڎو ژەنا کورڎەسانی و جەهانی و ئا ژەنې گەرەکشا بې ئا ئېشەیە بەربڕا کە بە دەسو سیستەمە تنڎڕەوەکا و ڕێکوزیاو داعشی و گرڎو ئا لایەنا کە ئیسلامی پەی مەرامو وېشا بەکارمارا، هەرچنڎە سەماو هونەرگەو وڵاتی کۊت ۋەرو هووروژمێوە ڕێکوزیای جە لایەنو ئا کەساوە کە ئێمە پېسە لایەنگراو داعشی پېناسەشا مکەرمێ."

واتیچش: "ئێمە ئا دەسە پیسا مشناسمې کە پەشتەو ئا هووروژماوە بېنێ پەی سەرکوتکەردەی ناسنامەو کورڎی، شۆڕشو ۋەرنیشتیچ بە شۆڕشو ژەنا پېناسە مکریۊ، پەرەپنەدای هونەرو کورڎی جە هێڵۊو ژەنا ئازاڎینە پیرۆزتەرین و بە قیمەتتەرین هەرمانەنە."

جە بەردەوامی ئەرەیاۋناکەینە ئامان، "گەلو ئێمە جە پانیشتو کورڎەسانینە مەرامە گڵیاوەکې ئا لایەنە تاریکاشا وینێنێ و هەڵوێسێوە هېقمشا نیشانە دا، پۆکەی بە نامې گەلو ۋەرنیشتو کورڎەسانیۊ سڵام جە پەشتیوانی و هەڵوێسو گەلەکەیما جە پانیشتو کورڎەسانینە بەتایبەت ئانې کە ئینې سلێمانینە مکەرمێ."

ئاماژە پانەیچ کریان: "جارێوە تەر سوپاسو ڕێکوزیاو کەشکۊڵی و زانکۆو ئەمەریکی جە سلێمانینە (AUIS)، هونەرمەڼا و ڕۆشنۋیرا، ڕۆنامەوانا، کوڕا و کناچا کورڎی و چالاکوانا کورڎی و هونەردۆساو سەرانسەرو کورڎەسانی و تەمامو بەشداراو کۆنفرانسو کورڎناسی مکەرمێ، پەی پێشوازیکەردەی و پاڵپشتیکەردەیشا جە گرووپو هونەرگەو وڵاتی."

جە کۊتایینە ئامان، "پېسە مېیانو چاند و هونەری و ئەدەبی پەشتیوانی وېما پەی هەرمانە و کۊششە سەرکۊتەکاو گرووپو هونەرگەو وڵاتی ئەسرار مکەرمېوە و پەنەوازا گەلەکەما عال بزانۊ کە ئاردەیناکې گرووپو هونەرگەو وڵاتی جە ئایندەنە جە ئاستێوە هېقمتەر و بەرزتەرەنە بەردەوامې مەبا."