جە کەمپو پەنابەرا گەشمەرڎە ڕۆستەم جوودی، ئەنجومەنو عەشتاری، هېزی شەوێ بە درووشمو ‘تەنیا ڕێوە پەی ماڕای هێزو پیلانی و پیلانگێڵنا ژیۋای کۆمیناڵ و بە ژیۋای کەردەی ویر و ویرۆکەکاو ڕابەر ئاپۆین’، بە ئەرەیاۋنېوە زنجیرە چالاکییەکاو وێش دژ بە قەرارو مافو هیوای، نەلاو کۆمیسیۆنی پەی لاو ڕابەر ئاپۆی و پیلانگێڵنی ٩و تشرینو یووەمی دەس پنە کەرد.

ئەرەیاۋناکەینە بە دەقێوە بێدەنگی پەی تەمامو گەشمەرڎاو ئازاڎیی کورڎەسانی، جە ئەرەمەرزیاو بنەیانەو گەشمەرڎانە دەسش پنە کەرد. دماتەر قیمەت نەرەخی، کۆردیناسیۆنو ئەنجومەنو عەشتاری، قسېش کەرڎې و دەسپنەکەردەو زنجیرە چالاکییەکاش ئەرەیاۋنا.

قیمەت نەرەخیە سەرەتا سەرنجش وست سەرو پیلانگێڵنی ٩و تشرینو یووەمی و واتش: “جە ٩و تشرینو یووەمو ١٩٩٨ی پیلانێوە دژ بە ڕابەر ئاپۆی ئەنجام دریا، ئی پیلانێ نەک تەنیا دژ بە ڕابەری، بەڵکوم دژ بە ئیرادەو گەلو کورڎی ئەنجام دریا. ئاڎی گەرەکشا بې جە ڕاو ڕابەر ئاپۆیۊ گەلو کورڎی، ناسنامە و بییەیش دلېنە بەرا، بەڵام بە ئەوەکۊشای ڕابەر ئاپۆی و هەڵوێسو گەلو کورڎی پیلانەکێ هۊرشیاوە.”

قیمەتە جە بەردەوامی قسەکاشەنە ئەرەیاۋناش کە بە دەسپنەکەردەی زنجیرە چالاکیێوە دژ بە ئا پیلانگێڵنییە، نیشانە مڎا نەک هەر پیلانەکێ بەڵکوو پیلانگێڵنېچ قەت بە مەرامەکاشا نمەیاوانێ و واتش: “بە سەرمەشقایەتی ئەنجومەنو عەشتاری، ئێمە پێسە و ژەنی دلې کەمپەکەی، بە درووشمو ‘تەنیا ڕا پەی ماڕای هێزو پیلانی و پیلانگێڵنا ژیۋای کۆمیناڵ و بە ژیۋای کەردەی ویر و ویرۆکەکاو ڕابەر ئاپۆین’، زنجیرە چالاکیێوە دژ بە قەرارو مافو هیوا دەس پنە مکەرمێ کە پەی ماوۊ مانگێوە بەردەوامې بانە. جە چالاکییەکانە سیمینار ئەنجام مڎریۊ و جە ٩و تشرینو یووەمینە پەی ئیدانەکەردەی پیلانگێڵنییەکەی، ژەنی ڕاپیمایێوە ئەنجام مڎا."

جە کۊتایینە قیمەت نەرەخیە ئەرەیاۋناش کە ژەنی و گەل بە ئیرادەو وېشاوە پەی ئازاڎیی بەڎەنی ڕابەر ئاپۆی درێژە بە ئەوەکۊشایشا مڎا.

ئەرەیاۋناکەی بە واتەیۊ درووشما کۊتاییش ئاما.