ئەنجومەنو شارو هۆلی، یووەمین کۆنفرانسو کۆمینەکاش چېرو درووشمۊو "کۆمینەکې بناغێنێ پەی بنیاڎنیاو ئاشتی و گلێرگەی دیموکراتیک"ی ئەنجام دا، جە ئەنجامنامەو کۆنفرانسەکەیەنە جەخت کریانۆ سەرو بەهێز کەردە و هەماهەنگی مابەینو کۆمینەکا.
ئارۆ پەنچشەمە، ئەنجومەنو شارو هۆلی جە کانتۆنو جەزیرەینە، یووەمین کۆنفرانسو کۆمینەکاش جە هۆڵو گرڏی کۆبوونەوەکاو شارۆچکەو ئوم حەجیرەینە ئەنجام دا. نوێنەرێ کۆمینەکا و ئەنداماو ئەرەمەرزیاکا و ڕیش چەرمێ و خەڵکو ناوچەکەی بەشدارۍ بێنێ.
هەرمانەکێ کۆنفرانسەکەی بە دەقێوە مردێ پەی یاڎو گەشمەرڎا دەسشا پنە کەرد، دماتەر بەشدار بییەکێ قسېشا کەرڎې و سەرنج وزیا سەرو دەور و ئاسۆکاو هەرمانکەردەی کۆمینەکا. ڕاوەبەرو جواناو ئەنجومەنو شارو هۆلی، حوسام حوسێنی، ئەرەیاۋناش کۆمین “شۆڕشێوە هزرییا” کە ڕابەر ئاپۆ بانگەوازیش پەی مکەرۊ، بەنا سەرو ئەوەفاڕای ململانێ چینایەتی و ململانێ دۊڵەتی و گرووپەکا پەی پیادەکەردەی "سۆسیالیزمو بەدیئامای"جە گلێرگەنە.
دەورو کۆمینەکا جە پەیمانو کۊمەڵایەتینە
هەرپاسە حوسامی سەرنجش وست سەرو دەورو کۆمینەکا جە پەیمانو کۊمەڵایەتیمە جە سەرنیشت و ۋەرکۊتوو سووریای، جەختش کەردۆ کە ئیدارەو خۆبەڕێوەبەری ژیۋای کۊمەڵایەتی و دیموکراتیک و ئازاڎی جە ڕاو کۆمین و ئەنجومەن و ئەکادیمی و هەرەوەزیی و یەکە ئیکۆ_کۊمەڵایەتییەکاوە بەرۆ ڕاود، چنی ئا ئەرەمەرزیایا کە سیستەمو گلێرگەی تەمام مکەرا. ئاماژەش پانەیە کەرد کە ئی فۆرمە جە ڕێکوزستەی کۆنفیدراڵی، سیستەمو دیموکراتیکو گلێرگەی بەهێز مکەرۊ.
ئاژەو سیاسی ئیسەی
ڕاوەبەرو ئەنجومەنو جابەجاکەرو کانتۆنو جەزیرەی، سەبری عەفرینی، شرۆڤێوە سیاسی سەبارەت بە ئاژەو ئیسەو سووریای و بەتایبەتی سەرنیشت و ۋەرکۊتوو سووریای پێشکەش کەرد و سەرنجش وست سەرو ئا ئاڵەنگارییا کە ڕووە ڕوو ناوچەکەی باوە بەمەڵامەتوو دەسوەردایە بەردەوامەکا چبەری.
هەرپاسە یاگەگیرو هامسەرۆکایەتی ئەنجومەنو گەلاو کانتۆنو جەزیرەی، عەبدولڕەحمان حەسەنی، هۊرسەنگنایش پەی هەرمانەو کۆمینەکا و گرنگیشا جە بنیاڎنیاو گلێرگەو دیموکراتیکینە کەرد و جەختش کەردۆ کە کۆمین “بنەماو ڕێکوزستەی خەڵکی و مسۆگەرکەردەی دادپەروەری و یەکسانییا جە مابەینو پێکئامایە جیاوازەکانە”.
دەرەنجامەکێ
دماو وتارەکا، گفتوگۊکې دەسشا پنە کەرد سەبارەت بە کۆمینەکا و شێوازو هەرمانکەردەیشا و ئا کێشې کە ڕووە ڕووشا باوە. ئامادەبېیێ جە ڕیشسچەرمەکا هۆزەکا و ئەنداماو کۆمینەکا و خەڵکو ناوچەکەی بە ڕا و پێشنیارەکاشا بەشداریشا کەرد، کە سەرنجشا وست سەرو هەرمانە و دەورو کۆمینی جە ڕێکوزستەی هەرمانو کارەکاو گلێرگەی و بەهێزکەردە و هاودەنگی.
جە کۊتایی کۆنفرانسەکەینە، کۆمەڵێوە دەرەنجامێ پەسەنڎێ کریې، کە گرنگتەرینشا ئینې بێنێ:
• جەختکەردەیۊ سەرو دەورو کۆمینی بە پایێوە سەرەکی پەی بنیاڎنیاو گلێرگەو دیموکراتیکی.
• پەرەپنەدای بە میکانیزمەکاو هەرمانەو کۆمینەکا بە شێوەیێوە کە چنی پەیمانو کۊمەڵایەتی گونجیۊ.
• پەشتیوانیکەردەی جە گلێرگە هامبەشەکا و یەکە ئابوورییەکا پەی یاوای بە خۆبژیۋی.
• بەهێزکەردە و هەماهەنگی مابەینو کۆمینەکا و ئەرەمەرزیاکا تەری پەی چەسپنای سیستەمو گلێرگەو دیموکراتیکی.
ئی دەرەنجامې بە فەرمی جە قەرارەکا و کۆنفرانسو یووەمو کۆمینەکا شارو هۆلینە پەسەنڎې کریې.
