ژەنې ڕاپیماکەرۍ ڕاپیمای ئازاڎی جە ئەنقەرە ئەرەیاۋنېوە ڕۆنامەوانیشا وەناوە و داواشا جە هێزە ڕامېیارییەکا کەرڎ گۊش جە ڕوانگەکاو ڕابەر ئاپۆی پەی سیاسەتو گفتوگۊو دیموکراتیکی گێرا.
ڕاپیمای ژەنا کە بە درووشمۊو "بە هیواوە بەرەو ئازاڎی ڕاپیمای مکەرمێ"، بە سەرمەشقایەتی تەڤگەرو ئازاڎی ژەنا (تەژەئا) حۊت ڕوێن جە ئامەڎۊ دەسش پنە کەردەن و ئارۆ ئینې ئەنقەرە. بە بەشداری زیاڎ جە ٢٥٠ ژەنا دمای پۊڕنای حۊت شارا، ئارۆ بە جەماوەری یاوې ئەنقەرە. ڕاپیماکەی سەرسەعبو ئارۆی جە گوڤەنپارکو کزلای جە ئەنقەرە گلېربیۊ، دماتەر ژەنې گەرەکشا بې تا ۋەرڎەمو پەرلەمانی بلانە بەڵام جە لایەنو پۆلیسیۊ ڕاشا ۋنە گیریا.
ژەنې جە یاگێ گلېرۊبیەکەیەنە ئەرەیاۋنېوە ڕۆنامەوانیشا وەناوە. جە کاتو وەنەیۊ ئەرەیاۋنەکەینە ژەنې سەرەمڕە درووشمەکاو "ئازاڎی ئازاڎی، ئازاڎی ڕابەرایەتی"، "بژیۋۊ سەرۆک ئاپۆ" و چنڎین درووشمې تەرېشا واتێوە.
جە وەنەیۊ ئەرەیاۋنەکەینە نالین گەزگۆرە قسېش کەرڎې و دمای سوپاسکەردەی جە بەشداری ژەنا واتش: "ئی ڕاپیمایما تا مسۆگەرکەردەی ئازاڎی ئېژا ئۆجالانی بەردەوام مەبۊ."
دماتەر ئا نامەو ڕابەر ئاپۆی ونیاوە کە پەی ژەنە ڕاپیماکەراش کیاستەبۍ، نامەکە بە جۆشێوە فرۊ پێشوازیش ۋنە کریا. دماتەر سەباحەت تونجەلە چالاکوانەو تەژەئای قسېش کەرڎې و ئاماژەش پانەیە کەرڎ ئامانجو ڕاپیماکەیشا بەدیئاردەی دادپەروەری و ئازاڎین پەی گەلو کورڎی.
تونجەلە جە قسەکاشەنە پېوەس بە پېخامەکەو ڕابەر ئاپۆی ئینەشە وات: "پېسە ژەنا تەژەئای پێشنیار پەی گرڎ لایەنەکا مکەرمێ، پێشنیارەکاو ئېژا ئۆجالانی پەی سیاسەتو گفتوگۊو دیموکراتیکی جابەجا بکەرا."
دمای ئەرەیاۋنەکەی، بەبێ گۊش پنەدای بە ڕاگېرتەی پۆلیسی، ژەنې بە واتەیۊ درووشماکا بەرەو ۋەرڎەمو پەرلەمانو تورکیای کۊتېڕا.
