بەداواداچوونەکان بۆ ڕوداوی دەستبەسەرکردنەکەی"ساڵح موسلم"، هاوسەرۆکی پێشووی پەیەدە و بەرپرسی دەستەی دبلۆماسی تەڤ ـ دەم، لە ڕێککەوتی ڕۆژی شەمەی ڕابردوو لە  پراگی پایتەختی چیک کەوتەوە، بەردەوامن.

لەو چوارچێوەیەدا، ئەمڕۆ لە بەرلینی پایتەختی ئەڵمانیا، دکتۆر مەسعود حەسەن، نوێنەری ڕۆژئاوای کوردستان لە بەرلین و شاندێکی یاوەری سەردانی بالیۆزخانەی وڵاتی چیکی کرد و لەلایەن باڵیۆزی ئەو وڵاتە ئۆسکار نۆڤاک و سارکا سترالۆڤا، بەرپرسی نوسینگەی سیاسی باڵیۆزخانەکەوە پێشوازیان لێکرا و پێکەوە کۆبوونەوە.

لە کۆبوونەوەکەدا، باس لە دەستبەسەرکردنەکەی ساڵح موسلم کرا و باڵیۆزی چیک بەناوی بالیۆزخانەکەوە نیگەرانی خۆی لە دەستبەسەرکردنەکە دەربڕیوە و وتویەتی:" وەزارەتی داد دڵنیایی داوە لە پاکی و بێتاوانی بەڕێز موسلم و هاوکات سکاڵاکەی دەوڵەتی تورکیای دژ بە ساڵح موسلمیشی بەناڕەوا زانیوە".
بالیۆزی چیک، جەختی کردوەتەوە:" هەمیشە دەرگای بۆ ساڵح موسلم لە سەر  پشتە و کەی بیەوێت بێ کێشە دەتوانێت سەردانی وڵتەکەمان بکات".

لای خۆیشیەوە، دکتۆر مەسعود حەسەن، نوێنەری ڕۆژئاوای کوردستان، سپاسی پێشوازی و هەڵوێستی باڵیۆز و بەرپرسانی باڵیۆزخانەی چیکی لە ئەڵمانیا کردوە و  هیوای خواستووە:"پەیوەندیەکانی نێوان هەردوولا زیاتر پەرەبستێن و پتەورتر بن و ئەوەی لەگەڵ ساڵح موسلم لە پراگ ڕوویدا هەرگیز دووبارە نەبێتەوە و ببێتە ڕابردوو".

پێشتریش، چەندین بەرپرسی باڵای وڵاتی چیک،   دەسەبەسەرکردنی ساڵح موسلمیان بەکاریکی کەسی لەناو پۆلیسی ئەنتەرپول بەناو کردبوو.
 هـ.هـ