ماڵپەڕی کۆمەڵەى مافی مرۆڤى کوردستان بڵاویکردووەتەوە، ئێوارەی دوێنێ چوارشەممە ٣ی تشرینى یەکەمی ٢٠١٨ / ١١ی رەزبەر، کۆلبەرێک کوردی تەمەن ٤٢ ساڵ بە ناوی عەزیم ئەحمەدی لەلایەن هێزە ئەمنییەکانى ئێرانەوە کوژراوە.

ئاماژە بەوەشکراوە، ئەو کۆلبەرە خەڵکی گوندی تەشاری شارۆچکەى نەوسود بووە و لە سنووری کوێستانێ سۆنی کراوەتە ئامانجی هێزە ئەمنییەکانى ئێران و کوشتویانە و تەرمەکەیان بەجێهێشتووە.

دواتر هاووڵاتیانى ناوچەکە بە دوای تەرمی ئەو کۆلبەرەدا گەڕاون و تەرمەکەیان لە ناو تاشە بەردەکاندا دۆزیتەوە، کە چەند گولـلەیەکى پێوەبووە. هاووڵاتییان دواتر تەرمەکەیان لە کوێستانەکە بردووەتەوە بۆ گوندەکەى خۆی تاوەکو مەراسیمى بەخاکسپاردنى بۆ ئەنجام بدەن.

ئەوەش خراوەتەڕوو، عەزیم ئەحمەدی خێزانداربووە و باوکی ٣ منداڵ بووە و لەو کاتێکیشدا کوژراوە، کە هیچ کۆڵێکى پێنەبووە.

ر.م